Stekkur fjárfestingafélag er öflugt fjölskyldufyrirtæki, stofnað árið 2010. Stofnendur voru feðginin Kristinn Aðalsteinsson og Guðlaug Kristbjörg Kristinsdóttir, sem hafa leitt félagið frá upphafi sem stjórnarformaður og forstjóri.

Stekkur hefur vaxið á undarförnum árum, samhliða því að stærstu félögin í eignasafninu hafa dafnað. Stekkur er virkur fjárfestir með skýra sýn á rekstur, stefnu og hlutverk sinna félaga. Þeirri sýn hefur Stekkur fylgt eftir með aukinni hlutdeild í lykilfélögum og er nú eini eigandi Securitas, auk þess að fara með 80% hlutafjár í Límtré Vírnet. 

Stekkur byggir á arfleifð Aðalsteins Jónssonar, útgerðarmanns frá Eskifirði sem markaði djúp spor í atvinnulíf Austurlands um áratugaskeið með framsýni sinni, þrautseigju og heiðarleika. Aðalsteinn skildi samspil atvinnulífs og mannlífs og fyrirtæki í hans eigu lögðu mikið til samfélagsins. Í þeim urðu til fjölmörg störf og verðmæti sem styrktu innviði þess – ekki aðeins efnahagslega, heldur líka menningarlega og félagslega.

Þessa hugmyndafræði fengu stofnendur Stekks í heimanmund og reka félagið í anda hennar. Fyrir vikið eru dótturfélög Stekks samfélagslega þenkjandi, með starfsemi og þjónustu um nær allt land. Eiginlegar starfsstöðvar eru m.a. á Flúðum, Reykjanesi, Eskifirði, Akureyri, í Borgarnesi og við Lyngháls og Tunguháls í Reykjavík.

Fjárfestingafélagið Stekkur er stolt af sínum fyrirtækjum, þeim vörum og þjónustu sem þau veita, áhrifum á nærsamfélagið og framlagi þeirra til vistvænni heims. Stekkur mun áfram styðja við sín félög, með áherslu á frekari vöxt og þróun í samræmi við skýra fjárfestingastefnu.